[container] Teiknaða stuttmyndin Wounded vann til verðlauna sem besta írska stuttmyndin gerð af nemendum á teiknimyndahátíðinni í Dublin fyrr í mánuðinum. Einn höfunda hennar er hin íslenska Helga Kristjana Bjarnadóttir. Myndin segir frá hermanni úr síðari heimstyrjöldinni sem þjáist af áfallastreituröskun og endurlifir atburði stríðsins. Hún var lokaverkefni Helgu og tveggja samnemenda hennar til BA prófs í teiknimyndagerð frá Irish School of Animation í Dublin.
Helga Kristjana Bjarnadóttir og Rory Conway, samnemandi hennar við Irish School of Animation og vinnufélagi hjá Cartoon Saloon.
En hvernig stóð á því að Helga ákvað að læra teiknimyndagerð? „Ég hef alltaf haft gaman af að teikna en þegar ég var yngri sá ég ekki fyrir mér að ég gæti einhvern tímann unnið við það. Ég hélt að þetta yrði bara hobbý með einhverju „alvöru“ starfi. En svo þegar ég var 16-17 ára áttaði ég mig á því að það að búa til teiknimyndir væri einmitt alvöru starf! Síðan hefur ekkert annað komið til greina.“ Eftir stúdentspróf af náttúrufræðibraut Menntaskólans við Sund fór Helga í fornám í Myndlistarskólanum í Reykjavík, sem hún ber góða sögu. Á meðan á náminu stóð sá hún að myndlist og hönnun væri ekki fyrir hana, heldur sannfærðist enn frekar um að teiknmyndagerðin væri hennar framtíðarvettvangur. „Ég held að ég sé mest heilluð af því hversu margar listgreinar sameinast í teiknimyndagerðinni. Myndlist, tónlist, kvikmyndafræði, hönnun, frásagnarlist og fleira,“ segir Helga. „List getur verið skilgreind sem eitthvað sem vekur hughrif hjá áhorfandanum, tjáir einhverjar hugmyndir eða sögu, eða bara eitthvað fallegt. Teiknimyndir gera allt þetta og meira, þar sem þær geta verið allt frá risastóru markaðsfyrirbærunum Disney og Dreamworks og yfir í tilraunakennd einstaklingsverkefni.“
Helga byrjaði í diplómanámi haustið 2010 og hélt svo áfram náminu þar á BA stigi. Hún segir að diplómanámið hafi falist í að þjálfa nemendurna í teiknimyndagerð. „Við lærðum að teikna hreyfimyndir ramma fyrir ramma á pappír og að nota tölvur til að skapa persónur og hreyfa þær.“ Nemendur sóttu einnig tíma í handritsgerð, myndmáli, kvikmyndafræði og módelteikningu. Helga segir mikla áherslu lagða á teiknikunnáttu og tæknilega getu. „Í BA náminu fengum við tækifæri til að nýta þá hæfni sem við höfðum byggt upp í diplómanáminu. Við þurftum að gera okkar eigin stuttu teiknimyndir, ýmist í hóp eða sem einstaklingar, og gera allt sjálf frá grunni. Við þurftum að skrifa handritið, hanna útlit myndarinnar, teikna bakgrunna og persónur og setja allt saman og ganga frá verkefninu.“ Helga segir þetta hafa verið góða og lærdómsríka reynslu. „Við að vinna þessar myndir fundum við flest okkar hillu í framleiðsluferlinu og náðum að sérhæfa okkur að einhverju leyti.“
Helga vann lokaverðlaunamyndina Wounded með þeim Gavin Fullerton og Julie Rush og segir þau hafa skipt á milli sín verkum eftir áhugasviði og getu. „Ég stýrði framleiðslunni, sá um skipulagningu, að allt yrði tilbúið á réttum tíma og að öll gögn væri á réttum stað. Ég teiknaði líka megnið af bakgrunnunum og sá um myndblöndun, en í því felst að setja saman bakgrunna og persónur og klippa allt saman.“
Þótt náminu sé lokið er Helga enn á Írlandi og ekki á leiðinni heim alveg í bráð. Frá því í ágúst hefur hún verið í starfsþjálfun hjá Cartoon Saloon í Kilkenny. Fyrirtækið er vel þekkt í teiknimyndaheiminum og gerði meðal annars myndina Secret of Kells (2009) sem var tilnefnd til Óskarsverðlauna sem besta teiknimyndin í fullri lengd. Helga segir Cartoon Saloon vera þekkt fyrir að sækja innblástur í írskan menningararf og fyrir fallega útlitshönnun. Nýjasta mynd þeirra Song of the Sea var frumsýnd á Alþjóðlegu kvikmyndahátíðinni í Toronto í september síðastliðnum. Myndin byggir á goðsögnum um „selkies“, sem við Íslendingar þekkjum úr sögunni um konuna í selshamnum. Verkefni Helgu í starfsþjálfuninni felst hins vegar í vinnu við sjónvarpsþáttaröðina Puffin Rock. „Þetta er krúttleg þáttaröð ætluð börnum á aldrinum 3-7 ára og fjallar um litla lunda og dýravini þeirra,“ segir Helga. „Ég vinn við myndblöndunina, geri allar myndavélahreyfingar og sinni alls konar tilfallandi verkefnum eins og laga liti, setja inn rigningu eða þoku, öldur í sjóinn og margt, margt fleira.“
Hvað tekur svo við þegar starfsþjálfuninni lýkur? „Starfsþjálfunin er þrír mánuðir og ég á að klára snemma í nóvember. En ég er svo heppin að það er búið að bjóða mér vinnu í stúdíóinu eftir að ég klára starfsþjálfunina, svo ég verð þar í nokkra mánuði í viðbót,“ segir Helga glöð í bragði. „Eftir það sé ég til hvort ég fæ áframhaldandi starf þar eða leita mér að einhverju nýju. Ég hef ekki áhuga á að fara í frekara nám akkúrat núna. Ég mun kannski íhuga það eftir nokkur ár.“
Í lokin var Helga spurð hver væri uppáhalds teiknimyndin hennar eða teiknimyndafyrirtækið. „Úff… þetta er rosalega erfið spurning. Ég ætla að svindla og velja nokkrar! Paranorman frá Laika, Lilo & Stitch frá Disney, Princess Mononoke frá Studio Ghibli og Song of the Sea frá Cartoon Saloon.“
Það verður spennandi að fylgjast með þessari ungu listakonu, sem dreymir um að gera teiknimyndaflóruna fjölbreyttari með fallegum myndum um allskonar fólk. „Mig langar að segja sögur um fólk sem sést ekki oft í aðalhlutverkum, til dæmis hinsegin fólk, þá sem eru ekki hvítir, fatlaða og fólk sem sem tilheyrir mismunandi minnihlutahópum.“
María Stefánsdóttir, meistaranemi í Hagnýtri ritstjórn og útgáfu.
[/container]
Leave a Reply