Legallý Blonde

Í Leikhús, Rýni, Umfjöllun höf. Jóhanna Sif Finnsdóttir

Margir hafa séð myndina Legally Blonde þar sem Reese Witherspoon er í aðalhlutverki sem ljóskan Elle Woods. Færri vita kannski að til er söngleikur sem byggður er á kvikmyndinni. Söguþráðurinn í báðum útsetningunum er svipaður. Elle Woods er forseti systrafélagsins og aðalskvísan í menntaskólanum en þegar kærastinn hennar, Warner Huntington III, hættir með henni til að komast inn í laganám í Harvard tekur hún til sinna ráða. Hún ákveður að gera allt sem í hennar valdi stendur til að komast líka inn í Harvard og elta það sem hún heldur að sé ástin í lífi hennar. Þegar þangað er komið kemst Elle að því að laganámið á vel við hana og hún er ekki bara sæt ljóska heldur líka efni í góðan lögfræðing.

Nú hefur Fúría, leikfélag Kvennaskólans í Reykjavík, sett upp söngleikinn Legallý Blonde í leikstjórn Agnesar Wild, sem þýddi einnig handritið með aðstoð frá leikhópnum. Þetta er stærsta uppsetning Fúríu til þessa en áður voru sýningarnar minni og yfirleitt settar upp í matsal Kvennaskólans. Það er ánægjulegt að Fúría skuli hafa ákveðið að fara þá leið að setja upp stærri sýningar en áður og leikhópurinn hefur stækkað og orðið mun fjölbreyttari í kjölfar þess. Í fyrra var söngleikurinn Litla hryllingsbúðin settur á svið í Iðnó og þar er Legallý Blonde er einnig sýnd.

Söngleikurinn er hressandi og skemmtilegur og lögin lífga söguþráðinn við. Mér þykir uppsetningin sem og þýðingin hafa tekist vel. Leikararnir, sem margir hverjir eru líklega að stíga sín fyrstu skref á sviði, standa sig vel. Mikið mæðir á Þórunni Birtu Sigurðardóttur í aðalhlutverkinu sem ljóskan Elle Woods, þar sem hún er á sviðinu nánast allan tímann og syngur og dansar, en hún leysti hlutverk sitt mjög vel af hendi. Í hlutverki Emmets, fátæka námsmannsins sem er ástfanginn af Elle, er Daníel Óskar Jóhannesson og hann var einnig sannfærandi. Það er erfitt að benda á ákveðna leikara þar sem þeir standa sig allir frábærlega en þó er vert að minnast á Pálínu Ingibjörgu Jónmundsdóttur í hlutverki Paulette Bonafonté. Hún er fantagóð söngkona og leikur hlutvert hinnar óöruggu Paulette af stakri prýði. Samskipti hennar og Kyle, sem leikinn er af Alexi Elí Scheitz Jakobssyni, eru einnig óborganlega fyndin.

Auglýsing (trailer) fyrir söngleikinn á Facebook-síðu Fúríu.

Þórunn Birta Sigurðardóttir í hlutverki ljóskunnar Elle. Mynd: leikhópurinn Fúría.

Helst er hægt að setja út á hljóðblöndunina í nokkrum lögum en lagatextinn er hluti af söguþræðinum og stundum var erfitt að greina orðaskil. Þá ber að nefna að leikhúsrýmið hefur sína galla. Salurinn á neðri hæð Iðnó hefur gegnt hlutverki leikhúss síðan 1897 og segja má að hægt væri að hressa aðeins upp á ýmislegt þar á bæ og færa í nútímalegra horf. Bæta þyrfti loftræstikerfið en loftið þar inni verður fljótt mjög þungt. Stólarnir sem boðið er upp á eru mjög harðir og óþægilegir og varla er hægt að ætla ömmunum sem voru með mér í för að sitja á þeim út heila leiksýningu. Við sátum í þriðju stólaröð og þar sem stólunum er raðað á flatt gólf, án stalla eða upphækkana, er erfitt að sjá á allt leiksviðið í einu. Það er óþægilegt þegar mikið er um að vera á sviðinu, til dæmis í dansatriðunum.

Sýningin er í heild vel heppnuð. Hún er hressandi, hröð og aldrei kemur dauður punktur. Það er skemmtilegt að mæta á menntaskólauppsetningar því leikgleði ungu leikaranna er svo áberandi, eitthvað sem maður sér ekki alltaf jafn mikið af hjá atvinnuleikurum. Fúría á hrós skilið fyrir þessa skemmtilegu leiksýningu og vel er hægt að mæla með að fólk mæti með púða (munið slæmu stólana í Iðnó) og gleymi sér eina kvöldstund með ljóskunni Elle Woods. Það þarf þó að hafa hraðar hendur en aðeins tvær sýningar eru eftir, 22. og 23. mars.

 

Aðalmynd: Leikhópurinn Fúría á æfingu.

Þessi umfjöllun var hluti af verkefnavinnu í námskeiðinu „Loksins, loksins: Vinnustofa í menningarblaðamennsku“ á vorönn 2018.

Um höfundinn
Jóhanna Sif Finnsdóttir

Jóhanna Sif Finnsdóttir

Jóhanna Sif Finnsdóttir er meistaranemi í HÍ.

Deila