[container] Í tilefni af 100 ára afmæli HÍ býður Hugvísindasvið almenningi, án endurgjalds, upp á nokkur örnámskeið á ýmsum sviðum hugvísinda. Námskeiðin standa yfir í þrjár klukkustundir, ýmist frá 9-12 eða 13-16, og eru öllum opin eftir því sem húsrúm leyfir. Ekki er farið fram á neina undirstöðukunnáttu heldur geta þátttakendur valið sér námskeið eftir áhugasviði.
Námskeiðin verða haldin í Árnagarði, stofum 201, 301 og 304 og Odda, stofum 101 og 201. Æskilegt er að fólk skrái sig fyrir fram vegna undirbúnings námsgagna. Sjá tengla hér fyrir neðan í skráningu, látið fullt nafn fylgja með skráningunni.
Athugið! Upplýsingar um stofuskipan í hverju námskeiði verða gefnar upp í síðasta lagi föstudaginn 4. mars og verða birtar á hi.is.
ÖRNÁMSKEIÐ KL. 9-12
Heimspeki: Gagnrýnin hugsun
Sjö meginþættir gagnrýninnar hugsunar í sögu og samtíð.
Umsjón: Róbert H. Haraldsson, prófessor í heimspeki.
Lýsing: Í örnámskeiðinu verður gerð grein fyrir sjö meginþáttum gagnrýninnar hugsunar eins og hún birtist í sögu og samtíð. Einnig verður leitast við að bera gagnrýna hugsun saman við aðrar leiðir við skoðanamyndun, s.s. fordómaleiðina og hina vísindalegu aðferð.
Skráning.
Kirkjusaga: Samband ríkis og kirkju á Íslandi
Fjallað um samband ríkis og kirkju á Íslandi frá 1874 til 2011.
Umsjón: Hjalti Hugason, prófessor í kirkjusögu.
Lýsing: Viðfangsefni: Fjallað verður um samband ríkis og kirkju á Íslandi frá 1874 til 2011 sem og þróun og breytingar sem orðið hafa á því á tímabilinu. Tekist verður á við þær ögranir sem samfélagsbreytingar, aukin fjölhyggja, lýðræðisþróun og mannréttindahugmyndir hafa í för með sér á þessu sviði og lítið til framtíðar.
Skráning.
Bókmenntir: Ástarsögur
Ástin á ýmsum tímum og myndum, frá Platoni til Tobbu Marínós.
Umsjón: Dagný Kristjánsdóttir, prófessor í bókmenntafræði og Helga Birgisdóttir, doktorsnemi.
Lýsing: Í námskeiðinu verður fjallað um ástina á ýmsum tímum og í ýmsum myndum. Við byrjum á því að skoða hvað gömlu Grikkirnir sögðu um ástina og vináttuna, komum við á miðöldum í riddaraástum og sjáum hvað Guðrún frá Lundi taldi mestu skipta í ástamálum. Fjöldamenningin var komin inn með forskriftir um ástina á fimmta áratug tuttugustu aldar og námskeiðið endar á vampírum, skvísubókmenntum og spurningunni: Hefur eitthvað breyst?
Eftirfarandi bækur verða til umfjöllunar í námskeiðinu Samdrykkjan eftir Platon, Flóres saga og Blankíflúr, Dalalíf (1.bindi) eftir Guðrúnu frá Lundi, Ást á rauðu ljósi eftir Jóhönnu Kristjónsdóttur, Ljósaskipti (1. bindi) eftir Stephanie Meyers og Makalaus eftir Tobbu Marínós. Kennslan fer fram í fyrirlestrum, umræðum og verkefnum.
Skráning.
Tungumál: Spænskt mál og menning
Kynning á spænskri tungu og menningu Spánar.
Umsjón: Hólmfríður Garðarsdóttir, dósent í spænsku og Pilar Concheiro, stundakennari í spænsku.
Lýsing: Meginmarkmið námskeiðsins er að kynna spænska tungu og menningu Spánar fyrr þátttakendum.
Námskeiðið er þriggja tíma hagnýtt grunnnámskeið. Þátttakendur fá innsýn í uppbyggingu spænskunnar og þjálfun í því að fóta sig í hversdagslegum aðstæðum. Kennsluefnið er fengið úr kvikmyndum, fjölmiðlum og af vefsíðum sem þátttakendur geta síðan nýtt sér til áframhaldandi náms. Námskeiðið gerir ráð fyrir virkri þátttöku nemenda í para- og hópvinnu.
Skráning.
Tungumál: Rússneska stafrófið
Rússneska stafrófið kynnt og stiklað á stóru um uppruna þess og sögu.
Umsjón: Rebekka Þráinsdóttir, aðjunkt í rússnesku.
Lýsing: Á námskeiðinu verður rússneska stafrófið kynnt og stiklað á stóru um uppruna þess og sögu. Einnig verður skoðað hvað er líkt og ólíkt með því og íslenska stafrófinu. Þegar betur er að gáð er rússneska stafrófið ekki jafn mikil hindrun/flókið og ætla mætti við fyrstu „sýn“.
Þátttakendum verður kennt að þekkja á prenti nokkur algeng orð sem blasa við þegar til Rússlands er komið og gott er að þekkja (t.d. veitingahús, salerni, inngangur, bíó o.fl.) Ef tími vinnst til geta þátttakendur fengið æfingu í að panta t.d. kaffi, te og bjór og – biðja um reikninginn.
Skráning.
ÖRNÁMSKEIÐ KL. 13–16
Tungumál: Skrautskrift og japanskt ritmál
Japanskt ritmál verður kynnt og undirstöðuatriði í skrautskrift. Kennslan fer fram á ensku.
Umsjón: Kaoru Umezawa, lektor í japönsku.
Lýsing: Kynning á japönsku ritmáli og kennsla í undirstöðuatriðum í skrautskrift. Nemendur fá að spreyta sig á skrautskrift. Athugið að kennslan fer fram á ensku.
Skráning.
Sagnfræði: Fátækt á Íslandi
Fjallað um framfærslu fátæklinga allt frá lokum 11. aldar til upphafs 20. aldar.
Umsjón: Már Jónsson, prófessor í sagnfræði.
Lýsing: Á námskeiðinu verður farið yfir löggjöf um framfæri fátæklinga allt frá lokum 11. aldar til upphafs 20. aldar. Miðað var við að fátækur væri sá einstaklingur sem ekki gat séð fyrir sjálfum sér eða sínu heimilisfólki og þurfti aðstoðar við. Einkum átti þetta við um börn og aldraða en jafnframt fulltíða einstaklinga sem áttu við vanheilsu að stríða eða fjölskyldur sem ekki tókst að sjá sjá sér farborða. Samkvæmt lögum bar ættingjum að annast fátæk skyldmenni en ef það gekk ekki fór fólk á sveitina og ýmist fékk styrk eða var látið fara á milli bæja. Tekin verða dæmi úr dómabókum og bréfum sem sýna kjör þessa fólks og lagt mat á það hversu stór hluti þjóðarinnar taldist til þurfamanna hverju sinni. Nemendur fá í hendur hefti með völdum textum sem verða ræddir í litlum hópum.
Skráning.
Bókmenntir: „Engin hornkerling vil ég vera“. Hallgerður Höskuldsdóttir í Njálu
Umsjón: Helga Kress, prófessor emeritus.
Lýsing: Hallgerður Höskuldsdóttir í Njálu, uppnefnd langbrók, er ein frægasta og um leið alræmdasta kona íslenskra bókmennta. Hún er aðalpersóna sögunnar, örlagakona, sem skilur eftir sig blóði drifna slóð hvar sem hún kemur. Á námskeiðinu verður fjallað lýsingu hennar út frá kenningum táknfræðinnar um samband karnivals, kynferðis og kvenna, en Hallgerður er ekki aðeins mikill líkami með fagurt hár sem dregur til sín karla, hún óþæg og lætur ekki að stjórn. Hún er góð að svara fyrir sig og notar tungumálið í stað vopna, neitar, eggjar, slúðrar, stelur og brennir, og hefur með þessum aðferðum afgerandi áhrif á framvindu sögunnar.
Skráning.
Íslenska: Handritalestur
Undirstöðuatriði kennd í lestri íslenskra miðaldahandrita.
Umsjón: Guðvarður Már Gunnlaugsson, rannsóknardósent og Jóhannes Bjarni Sigtryggsson, verkefnisstjóri.
Lýsing: Á þessu námskeiði verða kennd undirstöðuatriði í lestri íslenskra miðaldahandrita. Stutt kynning er í upphafi á íslenskum handritaarfi. Útskýrð verða hugtök í handritafræðum eins og til að mynda bönd, hásteflingar og styttingar. Þátttakendur fá einnig að spreyta sig á að lesa stutta texta úr handritum frá ýmsum öldum undir handleiðslu kennara.
Skráning.
Þýðingafræði: Fjölmiðlaþýðingar
Helstu þættir fjölmiðlaþýðinga í ljósvakamiðlum; skjátextun, talsetningu og innröddun.
Umsjón: Gauti Kristmannsson, dósent í þýðingafræði.
Lýsing: Við skoðum helstu þætti fjölmiðlaþýðinga í ljósvakamiðlum, skjátextun, talsetningu og innröddun í þessu námskeiði þar sem farið verður yfir aðferðir og hefði sem verkefninu tengjast. Þessar þýðingar eru meðal þeirra mest nýttu í flestum löndum heims og munum við skoða ýmis dæmi og reyna að skilja hvaða lögmál búa að baki þeim aðferðum og ákvörðunum sem fyrir valinu verða.
Skráning.
[/container]
Leave a Reply